Kubłanišća SŠT dźěłaja po dopóznaćach ewaluacije swojich zarjadnišćow
Chrósćicy (SN/MiR). Wot spočatka tohole lěta ma Serbske šulske towarstwo fachowu poradźowarku. Wórša Burkhardtowa, kotraž bě do toho wjacore lěta katolsku pěstowarnju w Kamjencu a na to Ralbičansku pěstowarnju „Dr. Jurij Młynk“ nawjedowała, w tymle wobłuku skutkuje. Přičina sylneje poradźowanskeje funkcije je, přihotować dźěćace dnjowe přebywanišća w nošerstwje SŠT na přichod. „Towaršnosć so měnja a globalizacija přinjese ze sobu nowe widy na žiwjenje. Na to mamy chowancow našich zarjadnišćow přihotować“, rozjasnja Wórša Burkhardtowa, kotraž nimo swojeje poradźowanskeje funcije tuchwilu tež „Chróšćan kołć“ nawjeduje.