Twjerdźu, zo njeje w stawiznach kolumny Widźał, słyšał, napisał (WSN) hišće ženje jedyn a tón samsny pisar WSN-lěto zahajił a zakónčił. Móžno to wězo je, prawdźepodobnosć pak je skerje snadna. W nowym planje mjenujcy steji, zo směm ja dźensa kaž tež 27. decembra 2018 pisać. Cyłkownje je 53 přinoškow planowanych, kotrež su pola 13 awtorow skazane. Jan Macka hižo njepisa, nowu pisarku/noweho pisarja njeje sportowa redakcija Serbskich Nowin zdobyć móhła. Snano so jej to w běhu tohole lěta poradźi.
WSN-lěto 2018 zahajam z podawiznu, kotraž je so loni kónc nowembra pola nas doma w Róžeńće stała. Zhromadnje z někotrymi wjesnjanami běchmy sej na 13. hrajnym dnju zwjazkoweje koparskeje ligi duel mjez Borussiju Dortmund (BVB) a FC Schalke 04 wobhladali. Fanow Schalke we wsy po zdaću nimamy – ju jedyn dźěła w Róžeńčanskej swěčkarni –, za to pak někotrych BVB-přiwisnikow, wjacorych fanow FC Bayern Mnichowa stajnje po jednym přiwisniku za Herthu BSC, FC Energiju Choćebuz a FC Rudne horiny Aue. Mamy pak tež kopicu fanatikarjow, hołdowacych Dynamu Drježdźany.
