Prózdninske lěhwo Serbskeho šulskeho towarstwa wospjet požadane
Wodowe Hendrichecy (SN/MiR). Spočatnje, to rěka w pózdnim nalěću, knježeše w nawodnistwje Serbskeho šulskeho towarstwa njewěstosć, hač změja tónraz kaž wšitke dotalne lěta tak wulku ličbu zajimcow za lětnje rěčne lěhwo SŠT. Wšako bě so wjele dźěći a młodostnych přizjewiło za jězbu kónc julija do Roma, hdźež so na putnikowanju ministrantow wobdźěla. Dwójny poskitk pak by někotryžkuli swójbny budget nastupajo poćežował. Přiwšěm je so znowa 54 šulerjow na poskitk SŠT do wočerstwjenišća „Querxenland“ we Wodowych Hendrichec podało. Wot minjeneje soboty hač do přichodneje póndźele dožiwjeja woni tam dyrdomdejski čas. Wobdźělnicy su šulerjo 3. do 9. lětnika z mnohich serbskich zakładnych a wyšich šulow kaž tež Serbskeho gymnazija. Wosebje wjele přizjewjenjow mějachu lětsa z Budyskeje kónčiny, mjez druhim z Radworja. Přijěli su prózdninarjo, mjez kotrymiž je 28 holcow a 26 hólcow, tež z Chrósćic, Worklec, Ralbic, ze Šunowa a samo z Drježdźan.
