Štyri šulerske cyłki přewjedźechu do nazymskich prózdnin na Budyskej Młynkec łuce šulske regionalne finale w kopańcy w starobnej klasy I.
Šulerjo 11. a 12. lětnika gymnazijow kaž tež powołanskeje šule z Wojerec wubědźowachu so po modusu „kóždy přećiwo kóždemu“. Za Budyski wokrjes nastupichu šulerjo Serbskeho gymnazija Budyšin (SGB). Woni běchu so z dobyćom na wokrjesnej runinje kwalifikowali. Zamołwity wučer Damian Bogusz měješe sylny kader k dispoziciji, zestajeny z koparjow serbskich sportowych towarstwow a Budissy Budyšin. Bjez jeničkich přećiwnych wrotow z předkoła nastupichu serbscy gymnaziasća połni sebjewědomja přećiwo powołanskim šulerjam z Wojerec kaž gymnaziastam z Wodowych Hendrichec a ze Zhorjelca.
Serbski gymnazij Budyšin – Powołanska šula „Konrad Zuse“ Wojerecy 0:0
Po wulosowanju dyrbjachu so serbscy gymnaziasća wokoło kapitana Johannesa Jatzwauka hnydom w prěnjej hrě turněra z Wojerowskim zastupnistwom měrić. Bogusz žadaše sej połnu koncentraciju wot prěnjeje mjeńšiny.