Zapadołužiski koparski zwjazk (WFV) je na halowe mišterstwa we Wojerecach přeprosył. Wosom mustwow wobdźěli so na turněrje w Powołanskošulskim centrumje Konrada Zusy, mjez nimi zakitowar pokala Natwar Wojerecy/Wětnica, DJK Módro-běli Kulow kaž tež Sokoljo z Ralbic. Cyłki hrajachu stajnje dźesać minutow, a to w dwěmaj staflomaj.
Sokoljo startowachu w skupinje B a nastupichu najprjedy přećiwo Jednoće Wojerecy. Wuhrachu sej tři stoprocentne šansy, bul pak nochcyše do saka. Samsny wobraz skićeše so w druhej partiji, w kotrejž su přećiwo zakitowarjej pokala Natwar Wojerecy/Wětnica znowa jenož 0:0 hrali, dobre móžnosće bohužel wospjet njewužiwajo.