Šulerjo olympiadu serbšćiny z dobrymi wukonami zakónčili

Wodowe Hendrichecy (SN/BŠe). Najlěpši, mjenujcy cyłkownje 97 serbšćinarjow 6. lětnikow šulow Hornjeje a Delnjeje ­Łužicy, su so wot pońdźele na lětušej 53. olympiadźe serbskeje rěče we Wodowych Hendrichecach wobdźělili. „Zwjeselace je, zo bě mjez nimi 36 šulerjow z Delnjeje Łužicy“, zdźěli předsydka Serbskeho šulskeho towarstwa Ludmila Budarjowa, kotrež wubědźowanje organizuje. Šulskemu towarstwu poboku su wučerjo, kotřiž zarjadowanje akribisce přihotuja. Lětsa dojednachu so wučer w Slepom Jan Hrjehor jako hłowny koordinator, wučerka Radworskeje wyšeje šule Sabina Jurencec, wučer Budyskeho Serbskeho gymnazija Metod Šołta a wučer w Slepom Ludwig Eckert na hłownu temu lěs. A kaž wuslědki šulerjow dopokazuja, hodźeše so z njej jara derje dźěłać. Tak zhotowichu plakaty a kreatiwny přednošk, kotryž bě jako ertne pruwowanje a skupinske dźěło zapołoženy. Kaž zamołwići rozprawjachu, docpěchu olympionicy dobre rěčne wukony při pisanju nastawka.