ST Marijina hwězda – ST Ćisk II 9:0 (5:0)
Zestawa domjacych: Matik – Wróbl, Škoda, Rab, R. Hawš, Peschmann (46. Pjetaš), Šołta, O. Hawš, Cyž (46. Bělk), Eldor, Pakoßnick (57. Schmidt)
Z wysoko zasłuženym domjacym dobyćom před 100 přihladowarjemi su sej chowancy koparskeho trenarja ST Marijineje hwězdy Erwina Kleinmanna hižo dočasnje staflowe dobyće a tak postup do wokrjesneje wyšeje ligi zawěsćili. Při lěćnych temperaturach hosćićeljo duel na hrajnišću jasnje postajachu. Wo prěnje wrota pak postara so Ali Eldor hakle w 16. min. z wěsće přetworjenej jědnatku, po tym zo bu Richard Hawš w šěsnatce potorhnjeny. Dalše wrota w prěnim połčasu třělichu Christoph Cyž z hłowu (22.) a z nohu (28.), Dawid Šołta z hłowu (36.) a Richard Hawš (39.), kiž trjechi ze zdalenosće 16 metrow. Hosćo mějachu jenož jednu naspomnjenjahódnu składnosć, kotruž pak wrotar Dawid Matik znješkódni (44.).