Wuměłske wubědźowanje za dźěći a młodostnych z wustajeńcu zwjazać
Budyšin (SN/MiR). W prózdninach so z wuměłstwom zaběrać je mnohim šulerjam samozrozumliwa wěc. Móža swoje wudźěłki po prózdninach we wobłuku wučby abo we wosobinskej rozmołwje z wučerjom wobjednawać. Budyski Serbski muzej sadźa na tónle zwisk mjez zaběru we wólnym času a wuknjenjom w šuli w dotal jónkrótnym projekće. Zajimcy wot šěsć lět a młodostni su namołwjeni so na wuměłskim wubědźowanju „Mólba – mój pisany pomnik“ wobdźělić. „W spomnjeću na serbskeho molerja Jana Buka smy projekt přihotowali. Přejemy sej, zo moluja zajimcy ćišno po podatymaj motiwomaj“, rozłožuje zamołwita za posrědkowanje kultury a zjawnostne dźěło na Budyskim Serbskim muzeju Mónika Ošikowa. „Při tym měli so orientować na wuměłskim stilu ekspresionizm, měli sylne barby, jasne formy a wjele začuća wužiwać. Składnostnje dnja wotewrjeneho pomnika njedźelu, 8. septembra, chcedźa muzejownicy najlěpše twórby we wustajenišću pokazać. Lětuši dźeń pomnika steji pod hesłom „Pomnik – wuměłstwo“.