Budyski Serbski muzej zwjazuje aktualnu wustajeńcu a nałožk

Budyšin (SN/MiR). Na prózdninsku zabawu „Helaw-Alaaf-Ahoi! Póstniske nory witajće“ přeproša Budyski Serbski muzej. Štó wě, što mataj baćon a jejkowy muž z póstnicami činić? Z kotreje přičiny so póstnicy runje nětko wotměwaja? A kotry wuznam měješe přaza něhdy za zahajenje póstniskeho časa? Wotmołwu na tele a mnohe dalše prašenja su muzejownicy hižo dźensa dali. „Za poskitk přizjewili su so předewšěm wowki z jich wnučkami. Dźěći njebydla we Łužicy a tuž maja pola nas składnosć, wo zašłosći zhonić a so ze serbskimi nałožkami, z jich stawiznami ale tež jich pěstowanjom w dźensnišim času zaběrać“, rjekny sobudźěłaćerka za kulturne sposrědkowanje a zjawnostne dźěło muzeja Mónika Ošikowa. W běhu krótkeho přednoška su muzejownicy mosćik wědy wo něhdyšej přazy, přez póstnicy hač k póstnemu časej tworili. „Informacije móža dźěći wužiwać pozdźišo tež we wobłuku šulskeje wučby“, tak Mónika Ošikowa. Hač do zahajenja zarjadowanja njebě hišće jasne, kelko wobdźělnikow změja.