Zastupjerjo Domowiny a Rady za serbske naležnosće Braniborskeje su póndźelu z tamnišej ministerku za kubłanje, młodźinu a sport Brittu Ernst (SPD) a ze statnej sekretarku za kubłanje Ines Jesse wuradźowali.

Podstupim (SN/MiR). Hłowne ćežišćo wuradźowanja bě polěpšić delnjoserbskorěčne kubłanske poskitki na šulach na zakładźe ewaluacije dotalneje wučby serbšćiny. Zaběrali su so tež z naležnosću, potrjebu wučerjow za předmjet delnjoserbšćina zawěsćić. Na zakładźe tuchwilneje starobneje struktury je widźeć, zo budźe přichodne lěta dale a wjac wučerjow serbšćiny trěbnych.