Serbscy gymnaziasća swoje wuswědčenja swjatočnje přijimali
Budyšin (SN/bn). „Česćeni maturanća, witam was, wašich staršich a wučerki a wučerjow Serbskeho gymnazija Budyšin (SGB) na dźensnišu maturitnu swjatočnosć – nažel w małym kole, za to pak z dwěmaj premjeromaj. Sprěnja swjećimy prěni raz na žurli Němsko-Serbskeho ludoweho dźiwadła, zdruha móža waši sobušulerjo a přiwuzni přepodaće wuswědčenjow prěni raz jako livestream sćěhować“, zahaji šulski nawoda SGB René Wjacławk lětuši tak mjenowany abibal hornjoserbskich gymnaziastow minjeny pjatk w Budyšinje.
Intendantka Serbskeho ludoweho ansambla Judith Kubicec dopominaše so w swjedźenskej narěči na swój čas na tehdy Serbska rozšěrjena wyša šula mjenowanym kubłanišću kaž tež na slědowacy puć do powołanja. Z pomocu baje wo Pintlašku wona wotchadnikow namołwješe: „Njemějće strach! Njebojće so zmylkow! Dźiće do swěta, spokojće swoju wćipnosć a mějće serbskosć stajnje při sebi! Tale kajkosć wašeje identity njebudźe nihdy njelěpšina. Namakajće za sebje prawy puć. Wjele zboža!“