Wobmjezowanja na wyšimaj šulomaj Ralbicy a Worklecy

Budyšin (SN/MiR) Najwjetši problem je a wostanje njedostatk wučerjow. To wuchadźa z naprašowanja SN na Budysku regionalnu wotnožku Sakskeho krajneho zarjada za šulu a kubłanje (LaSuB). Tak dyrbja na Serbskim gymnaziju Budyšin kaž tež na Wojerowskim Lessingowym gymnaziju w tymle šulskim lěće naj­prjedy raz z mjenje wučerjemi wuńć, hač bychu trjebali. Wučba serbšćiny pak je na woběmaj kubłanišćomaj zaručena. „Nje­móžemy dotal hišće dokładnje rjec, kelko wučerjow na šulach w zamołwitosći Budyskeje LaSuB pobrachuje. Doskónčnje jasne budźe to hakle na rozsudnym terminje 15. oktobra“, wuswětla nowinski rěčnik zarjada dr. Jens Drummer. Runje tak je to z ličbu šulerjow, kotřiž chodźa do 5. lětnika na serbskich a serbšćinu wuwučowacych wyšich šulach kaž tež na Budyskim Serbskim a Wojerowskim Lessingowym gymnaziju. „Hač do mjenowaneho termina su stajnje hišće změny móžne. Hakle potom mamy konkretne a zwjazowace ličby ze stron šulow.“