W rěčnym lěhwje SŠT knježitej serbska rěč a dobra zhromadnosć
Wodowe Hendrichecy (SN/MiR). Dopołdnja, krótko po dźesaćich, začuwaš w rěčnym lěhwje Serbskeho šulskeho towarstwa we Wodowych Hendrichecach přijomnu napjatosć. 93 šulerjow z nimale wšěch serbskich zakładnych a wyšich šulow, jedneje serbšćinu podawaceje wyšeje šule a z Budyskeho Serbskeho gymnazija dźěła na swojim tydźenskim nadawku. Tež dźěći z Drježdźan, pochadźace z tam bydlacych serbskich swójbow, su mjez wobdźělnikami woblubowaneho prózdninskeho poskitka SŠT.