RCW poskitk kursow serbšćiny nahladnje do Wojerec a Slepoho rozšěrja

Budyšin (SN/at). Ličba 17 na spočatku noweho šulskeho lěta w zamołwitosći Rěčneho centruma WITAJ (RCW) po­skićenych kursow serbšćiny w Hornjej a srjedźnej Łužicy je lětsa jara spomóžna, kaž z jeho internetneje strony wuchadźa. To zwisuje z přiběracym zajimom za našu maćeršćinu pod dwěmaj aspektomaj. W RCW rozeznawaja mjez tak mjenowanymi Witaj-kursami a tajkimi, kotrež přewjeduja w kooperaciji ze Serbskej rěčnej šulu Budyskeje wotnožki Krajneho zarjada za šule a kubłanje (LaSuB), kaž nawodnica RCW dr. Beata Brězanowa wuswětla. Rěčny centrum takrjec wupomha, dokelž LaSuB za Serbsku rěčnu šulu žadyn personal přistajić njesmě, ale jenož honorarowe mocy.