Němske narodne koparske mustwo muži je druhi króć pospochi w předkole swětowych mišterstwow zwrěšćiło. W třećej skupinskej hrě WM w Katarje drje dobychu Němcy ze 4:2 přećiwo Costa Rice (hlej rozprawa póndźelu), dokelž pak w paralelnej hrě Španiska 1:2 přećiwo Japanskej přěhra, wosta Němska najebać dobyća na třećim městnje. Japanjenjo dobudu z tym skupinu E a trjechja we wosmifinalu na Chorwatsku. Španiska na druhim městnje dóstanje w přichodnym kole Marokko. Najprjedy pak bě wšitko za triumfom Španiskeje wupadało. Najebać pjeć změnow mjez prěnimi jědnaćomi trenarja Luisa Enrique nawjedowaše Španiska přez Álvaro Moratu, kotryž flanku Césara Azpilicuety do saka zhłójčkowa (11.). Mało japanskich ofensiwnych akcijow běchu njedokładne a hektiske. K połčasej pak přińdźe pola Japanskeje z Ritsu Doanom hrajer SC Freiburga, kotryž bě hižo přećiwo Němskej trjechił. A spěšnje je znowa wurunanje třělił (48.). Krótko na to docpě hrajer z Düsseldorfa Ao Tanaka po přihrawce tohorunja zaměnjeneho Kaourija Mitomy, samo nawjedowanje (51.).