Argentinske narodne koparske mustwo steji po wuspěchu 3:0 nad Chorwatskej w finalu swětowych mišterstwow (WM) w Katarje. W spočatnej fazy wuhra sej Chorwatska wčera wječor drje jasne lěpšiny, dokelž měješe dlěje bul w swojich rjadach, traješe pak 25 mjeńšin hač do prěnjeje třělwy na wrota w stadionje ­Lusail, a tu mějachu Argentinjenjo. Na to so hra zaso tróšku změrowa a kaž z ničeho bu nadobo strašne. Při dołhim bulu Fernándeza chorwatski nutřkowny škitar Dejan Lovren njekedźbowaše, a za Juliána Álvareza wotewri so dźěra. Jako nadběhowar Manchester City bul nimo Livakovića zběhny, přinjese tutón jeho k padnjenju. Sudnik Daniele Orsato pokaza hnydom na pokutny dypk, kapitan Lionel Messi zapali kop z twjerdej třělwu naprawo horjeka do wrotow (34.).