42 000 dźěći po cyłej Sakskej woswjeći kónc tydźenja swój zastup do šule. Dźensa podadźa so prěni dźeń do šule. Tež na serbskich kubłanišćach nowe 1. lětniki witaja.

Budyšin (SN/pdź). Za wjac hač poł miliona šulerkow a šulerjow zahaji so dźensa w Sakskej nowe šulske lěto. Za starše dźěći wšak je to po šěsć tydźenjach prózdnin nawrót do rutiny wšědneho dnja, za šulskich nowačkow pak start do noweho žiwjenskeho wotrězka. „Witaj 1. lětniko“ wuhladachmy kónc tydźenja na někotrychžkuli taflach našich serbskich kubłanišćow. Na přikład w Radworju. Tam witaja lětsa 34 šulskich nowačkow. 14ćo z nich chodźa do maćernorěčneje rjadownje 1a a 20ćo přisłušeja rjadowni 1b za serbšćinu wuknjacych. „Wuwědommy sej kajke bohate kubło dwurěčnosć je“, namołwješe direktorka tamnišeje serbskeje zakładneje šule Angela Rynčowa při sobotnišim witanju nowačkow. Wulku wažnosć kładźe na to „w šuli serbsce rěčeć a spěwać“. W jeje narěči a we witanskim programje staršich šulerjow pak bě serbski podźěl poměrnje snadny.