Za nowe šulske lěto je Ludowe nakładnistwo Domowina (LND) zhromadnje z pedagogiskim wotrjadom w Rěčnym centrumje WITAJ (RCW) zaso tójšto nowych wučbnicow a dźěłowych zešiwkow wudało. Z nowej wersiju „Nazwukoweje tabulki“ za BOOKii zahaji so rjad přidatneho materiala za zakładne šule.

Budyšin (SN/HaJ). K druhemu nakładej fible předleži zaso nazwukowa tabulka. To nowe při tym je, zo hodźi so tabulka tež ze słuchopisakom BOOKii wužiwać. Nazwukowa tabulka bě so hižo w zašłych třoch lětach jako přiłoha k wučbnicy „Naša fibla“ přidała. Ze zawjedźenjom noweho pismika hodźi so tabulka přidatnje we wučbje serbšćiny za pomjenowanje pismika zasadźować. Přidatnje móža wuknjacy z pomocu dweju hrow nawuknjene pismiki na zabawne wašnje wospjetować abo spěw „Ja sym mała sowa“ wothrać. W hrě „Namakaj prawy pismik“ maja so dźěći ze pisakom praweho pismika dótknyć. W druhej hrě su zbytne pismiki schowane. Tu maja dźěći we wěstym časowym ramiku prawy pismik namakać. Tež tu so po připadowym principje stajnje pjeć pismikow pyta.