Na wotchadnej jězbje do Čěskeje wotkrywachu sej šulerjo lěpšinu serbšćiny
Praha (SN/MiR). Tónle tydźeń přebywachu šulerjo 10. lětnika Worklečanskeje Serbskeje wyšeje šule „Michał Hórnik“ w Praze. Po mnohich lětach, w kotrychž pobychu wotchadne lětniki tohole kubłanišća přewažnje w Hamburgu abo Berlinje, su so młodostni jednohłósnje za Prahu rozsudźili. „Jedyn ze šulerjow běše čěsku stolicu jako cil mjenował a wšitcy druzy mějachu namjet za dobry“, tak rjadowniska wučerka Katka Bukowa. „A rozsud bě prawy“, praji wona krótko do zakónčenja jězby. Zdobom so wona nadźija, zo so tež přichodne lětniki za „złotu Prahu“ jako cil poslednjeje rjadowniskeje jězby na wyšej šuli rozsudźa.