Na fachowej konferency „Dyrbimy rěčeć!“ za wotmołwami pytali

Budyšin (SN/MiR). Na žurli Budyskeho Serbskeho muzeja schadźowachu so wčera kubłacy z dźěćacych zarjadnišćow, ze šulow, ze socialneho a medijoweho dźěła kaž tež wědomostnicy na fachowej konferency pod titulom „Dyrbimy rěčeć!“. Hłowna tema, z kotrejž so tu zaběrachu, je wažny žiwjenski wotrězk kóždeho dźěsća: Přechod z předšulskeje skupiny w pěstowarni do 1. lětnika zakładneje šule. Zarjadowarjej konferency běštej Domowina a Serbske šulske towarstwo (SŠT). Jednaćel SŠT Andreas Ošika zwurazni, zo „maja dźěći w předšulskej starobje wulku napjatosć – wjesela pak so na zastup do šule kaž tež na to, zo su nětko skónčnje wulke dźěći.“ Nawodnica muzeja Christina Boguszowa wuzběhny bo­hatosć kubłanskich móžnosćow wusta­jenišća hladajo na serbsku rěč. Naměstnica intendanta Němsko-Serbskeho ludoweho dźiwadła za serbske dźiwadło Madleńka Šołćic, skedźbni na wosebite poskitki klankodźiwadła za pedagogiske dźěło kubłacych.