Myto za angažement młodźiny (JEP) w Budyskim wokrjesu wupisane

Budyšin/Biskopicy (SN/MiR). Biskopičanska syć za dźěło z dźěćimi a młodźinu z.t. (KiJu) je lětsa zaso myto za angažement młodźiny wupisała. Hišće hač do kónc oktobra móža so jednotliwcy a skupiny, kotrež w Budyskim wokrjesu bydla a skutkuja, wo nje požadać. Hórčanka Bernadette Zellerowa, kotraž nimo kolegi Torstena Sempera projekt doprědka ćěri, so dopomina: „Hač do lěta 2019 mějachmy swójski projekt, z kotrymž smy angažement ludźi za towaršnosć hódnoćili. Při wuhódnoćenju pak smy zwěsćili, zo trjebaja młodostni hinašu formu. Na te wašnje smy w lěće 2021 zhromadnje z młodostnymi nowy koncept wuwili.“ Nětko ma KiJu partnerow poboku. Prěni dobyćer nazymu 2021 běše młodźinski klub Pančicy-Kukow. Mjeztym tehdy hišće aktiwna čłonka kluba Jadwiga Šnajdrec w jury sobu skutkuje, w kotrejž šěsć čłonow, pochadźacych ze wšelkich kónčinow Budyskeho wokrjesa, najbóle putacych poskićerjow wubjerje.