Kulowska wyša šula w duchu Kocora skutkuje

Montag, 22. Januar 2024
Artikel bewerten
(0 Stimmen)
Šulerki Thea Heibachec, Laura-Isabel Korchec, Emilia Rincec a Liza Lipičec witachu Thomasa Kaspera (wotl.) zašły pjatk na Dźeń wotewrjenych duri do Kulowskeje wyšeje šule „Korla-Awgust Kocor“.  Foto: Andreas Kirschke Šulerki Thea Heibachec, Laura-Isabel Korchec, Emilia Rincec a Liza Lipičec witachu Thomasa Kaspera (wotl.) zašły pjatk na Dźeń wotewrjenych duri do Kulowskeje wyšeje šule „Korla-Awgust Kocor“. Foto: Andreas Kirschke

Kulow (AK/SN). Kulowska wyša šula „Korla Awgust Kocor“ je zašły pjatk na Dźeń wotewrjenych duri přeprosyła. Šulska nawodnica Ines Lešowa zwěsći, zo maja „serbska rěč, kultura a hajenje tradicijow na kubłanišću stajnje wysoku hódnotu.“ Wuwučuja tam serbšćinu jako předmjet a poskićuja ju zdobom jako cyłodnjowski poskitk.

Tuchwilu wuknje 46 z 315 šulerjow serbšćinu po koncepće 2plus, dźesać šulerjow w 5. lětniku, dźewjećo w 6., šesćo w 7, dźesaćo we 8., šesćo w 9. a pjećo w 10. lětniku. Sabina Modšingowa z Ćiska wuwučuje serbšćinu w 5., Zuzana Rečelina z Kulowca w 6. a 7. a maćeršćinarka Ines Lešowa w 9. a 10. lětniku. Nimo toho móžeš serbšćinu tež jako cyłodnjowski poskitk dožiwjeć. Ličba wobdźělnikow na cyłodnjowskim poskitku je wšelakora, wotwisna wot zajima a wobsaha. „Dźakowano tomule poskitkej, mamy składnosć cyle zaměrnje wšelake projekty organizować“, rjekny Ines Lešowa. „W tymle šulskim lěće podamy so w aprylu na ekskursiju do Delnjeje Łužicy na Radušanske słowjanske hrodźišćo. Tam zeznajomjeja so šulerjo ze stawiznami Łužicy a geografiskimi wosebitosćemi Błótow.

Veröffentlicht in Kubłanje
Bitte anmelden, um einen Kommentar zu posten

Serbska debata

Neuheiten LND