Dale a wjac politiskich terminow, ale zjawne wuslědki dotal snadne

Drježdźany/Budyšin (SN/mb). Z kotrym prawom je sakske kultusowe ministerstwo do tworjenja rjadownjow na Serbskej zakładnej šuli w Radworje „nutř knježiło“? Tute prašenje sy zašłe dny w rozmołwach z Domowinu a Serbskim šulskim towarstwom (SŠT) husćišo słyšał. Zjawna wotmołwa tež po wuradźowanju wobeju towarstwow ze zastupjerjomaj kultusoweho ministerstwa w Drježdźanach wčera popołdnju njepředleži. Po naprašowanju našeho wječornika na serbsku stronu zetkanja smy jeničce zhonili, zo běše wuradźowanje „interne a jara konstruktiwne“, ale „bjez wuslědkow za zjawnosć“. Dźěłowy proces wothłosowanja pokročuje. Jedna partnerka z ministerstwa za blidom běše Kerstin Wittig. Wona słuša tež do wodźenskeje skupiny 2plus, kotraž je so póndźelu w Budyšinje schadźowała.