Ze Serbiniadu šulerjam podobnosć słowjanskich rěčow spřistupnili

Budyšin (SN/MiR). Prěnja Serbiniada njewostanje poslednja. To je nadźija po wuspěšnej premjerje srjedu w Budyskim Serbskim muzeju. Zaměr běše, zwiski mjez serbšćinu wuknjacymi młodostnymi ze cyłeje Łužicy tworić. Za to zetkachu so w pjeć skupinach stajnje šulerjo z Budyskeho Serbskeho a Choćebuskeho Delnjoserbskeho gymnazija kaž tež z wyšich šulow Budyšin, Worklecy, Slepo a Kulow. Wučer za sport a serbšćinu we Worklecach Šćěpan Wjeńka rjekny: „Wočakowanja na projekt běchu dosć wulke. Myslu, zo je so radźiło, šulerjow k tomu motiwować, serbšćinu we wšelakich wobłukach, nic jenož w šuli nałožować.“