W Budyskej Sprjewinej kupjeli bě so zašły tydźeń regionalne finale šulerskeho wubědźowanja „Młodźina trenuje za olympiju“ w sportowej disciplinje bičwolejbul přewjedło. Nimo Serbskeho gymnazija Budyšin běchu so mustwa z Biskopic, Zhorjelca a Wodowych Hendrichec za tute wubědźowanje kwalifikowali. W starobnej klasy 14 hraje so po wolejbulowych prawidłach kaž w hali. Na hrajnišću pak matej stajnje dwě holcy a dwaj hólcaj stać.

Prěni přećiwnik Józefa Bobki, Bena Šmita, Terezy Maćijec a Leje Wjacławkec bě gymnazij z Wodowych Hendrichec. Jasnje tutu hru w dwěmaj sadźbomaj dobychu. W druhej hrě nastupi kwartet SGB přećiwo Biskopičankam a Biskopičanam. Sportowcy Serbskeho gymnazija běchu trochu napjeći, dokelž ma gymnazij z Biskopic stanje jara dobrych hrajerjow a hrajerki. Po přěhratej prěnjej sadźbje dyrbješe so štwórtka Serbskeho gymnazija koncentrować. Druhu sadźbu dobychu z 21:16. Z dobrymi nadaćemi móžachu třeću samo z 21:8 za sebje rozsudźić.