W žłobikach liča z mjenje dźěćimi – to změje wuskutki na šule

Łužica (SN/WŽ). Sofija Nukowa je wolóžena: W awgusće nastupi młoda žona z Lejna dźěłowe městno jako kubłarka w „Chróšćan kołću“. Tele dny wona swoje třilětne wukubłanje pola zwjazka Carity w Budyšinje zakónči. We wobłuku swojeho praktikuma je 36lětna hižo w Chróšćanskim dźěćacym dnjowym přebywanišću dźěłała. „Aktualnje je ćežko, w pěstowarni abo žłobiku dźěłowe městno dóstać. Moje zrěčenje je najprjedy na lěto wobmjezowane“, wona powěda. Zo su dźěłowe městna w tutym wobłuku wot ličby dźěći wotwisne, wšak bě jej wote wšeho spočatka wědome. „Jako swoje wukubłanje před třomi lětami započach, pak nichtó z tym ličił njeje, zo budźe mjeztym tak mało dźěći.“

Wo něhdźe štwórćinu je ličba nowonarodźenych w Sakskej w běhu zašłych štyrjoch lět woteběrała. Mjeztym zo je so 2020 hišće 33 400 dźěći narodźiło, bě jich loni jenož 24 700.