We wobłuku swojeho seminara wo Serbach pola docentow Choćebuskeho Serbskeho instituta, zaběraja so studenća wučerstwa na Braniborskej techniskej uniwersiće (BTU) ze serbskimi slědami w Złym Komorowje a wokolinje.
Zły Komorow (SN). Město, kotrež je wuskutkow brunicoweje industrije dla wjele swojeje serbskeje identity zhubiło, słuša hakle wot lěta 2017 zaso oficialnje do serbskeho sydlenskeho ruma.
Njedawno su so studowacy kaž tež docenća w Złokomorowskej Serbskej cyrkwi na rozmołwu z domoródnymi serbskim akterami zešli, tak rozprawja wědomostny sobudźěłaćer Choćebuskeho Serbskeho instituta Měto Nowak w poslednim wudaću Noweho Casnika. Mjez druhim rozmołwjachu so z čłonomaj tamnišeje Domowinskeje skupiny Ginterom Pawlišom a Rainerom Ptaškom, z čestnohamtskim zamołwitym za serbske naležnosće města Zły Komorow Falkom Peschelom, ze zamołwitej za serbske naležnosće wokrjesa Hornje Błóta-Łužica (OSL) Hanku Rjelcynej a z referentku za serbske naležnosće w braniborskim kulturnym ministerstwje Cathleen Bürgelt, kotraž ze Złeho Komorowa pochadźa.
