Prawicarske ataki, hroženja z bombu a suicid w statistice wo sakskich šulach

Drježdźany/Budyšin (SN/MiP). Romy Penz, wot lěta 2019 zapósłanča strony AfD w Sakskim krajnym sejmje, je dnja 24. junija pola Sakskeho knježerstwa tři tak mjenowane małe naprašowanja zapodała. Chcyše zhonić, kelko padow „wosebitych podawkow“ su sakske zakładne a wyše šule kaž tež gymnazije na Krajnym zarjedźe za šulu a kubłanje (LaSuB) zapodali. Wona žadaše sej dokładne rozklučowanje jednotliwych padow na jednotliwych šulach kaž tež podaće staćanstwa wobdźělenych šulerjow. Nimo toho chcyše Romy Penz wědźeć, kelko šulerjow je njeskutka dla šulu wopušćić dyrbjało, tež tu z dokładnym podaćom staćanstwa šulerja. Wotpohlad, zo chce zapósłanča AfD ze statistiku dopokaz za negatiwny wliw šulerjow z migraciskim pozadkom na sakskich šulach dopokazać, je wočiwidny.