Elaine Jenčec w klubach po puću – prawicarska namóc palaca tema

Elaine Jenčec (CDU), zapósłanča Sakskeho krajneho sejma, je tuchwilu po klubach w Budyskim wokrjesu po puću. „Młodźina dyrbi w politice wjac skedźbnosće dóstać“, wona praji. „Hustohdy so młodostnym přemało zamołwitosće přepodawa abo woni so scyła njezapřijeja.“ Pod hesłom ,,Kołbaska syda wote mnje – temy wot tebje“ je so wona mjeztym w pjeć młodźinskich klubach, mjez druhim w Chrósćicach a Miłoćicach, z młodostnymi na rozmołwu zetkała. Zahajiła­ je zapósłanča turu zhromadnje z Alexanderom Dierksom (CDU), prezidentom krajneho sejma, w Chróšćanskim młodźinskim klubje. Tu sydaše wuwzaćnje tykanc město kołbaski. 37lětny Dierks, po słowach Jenčec najmłódši prezident krajneho parlamenta po cyłej Němskej, je hnydom dobry zwisk z wobdźělnikami zetkanja nawjazał.