Horstka swěrnych twori nowy zakład za přichod regionalneje rěče

Slepo (SN/mb). „Ho zachopjonku jo było to słowo“ njeje jenož spočatk sćenja swjateho Jana, ale titul wučbnicy slepjanšćiny, kotrejež awtoraj běštaj Juliana Kaulfürstowa a Syman Blum. Štož je kónc 2022 towarstwo Kólesko w kooperaciji ze Serbskim institutom wudało, je dźensa we wšědnym dźěle Kaulfürstoweje zakótwjene. Wona dźě skutkuje jako rěčna motiwatorka w nadawku Syće za serbsku rěč a regionalnu identitu (ZARI) za kónčiny wokoło Slepoho a Wochoz. Hakle póndźelu je so konwersaciski kurs slepjanšćiny zaso w Rownom na Njepilic dworje wotměł. To je kruh dźesaćoch, mjez nimi maćeršćinarjo, kotřiž so swěru zetkawaja, zo bychu słowoskład a gramatiku zwučowali a so ze „Slěpjańskim rozprajakom“ zaběrali, kaž přiručka rěka.