Prěni raz spožčene literarne myto Smolerja 2025 Sylwiji Šěnowej za jeje antologiju „Mosty přez morjo“

Składnostnje 25. róčnicy załoženja je Towarstwo přećelow Smolerjec kniharnje Myto Smolerja wupisało a lětsa prěni raz spožčiło. Z wuznamjenjenjom počesćuja najlěpšu twórbu słowneho wuměłstwa minjenych třoch lět. Wozjewjamy na tutym městnje lawdaciju, kotruž je Měrćin Wjenk minjeny pjatk w mjenje jury a předsydstwa towarstwa w Radworskej „Meji“ přednjesł.

Sylwiji Šěnowej spožči so Literarne myto Smolerja 2025 za basnisku zběrku „Mosty přez morjo“. Mytowansku jury přeswědči kniha, dokelž je lyrisce a rjemjeslnisce zdokonjana, towaršnostnje wuznamna a dokelž pokaza wědome rozestajenje ze serbskimi literarnymi tradicijemi. Wona njeje jenož poskitk do zjawneho dialoga wo wuměłstwje, ale so z jednotliwymi basnjemi na nim tež wobdźěli.