Wotmołwa knježerstwa na naprašowanje zapósłanca diskusiju zbudźiła

Budyšin/Drježdźany (SN/mb). Na prěni pohlad je Budyski zapósłanc krajneho sejma Frank Peschel (AfD) ličby kaž bombu wotkrył. W aktualnym małym naprašowanju sakskemu knježerstwu je so wón mjez druhim za wupadom wučbnych hodźin na šulach regiona zašłe lěta wobhonił. Nimo toho je so njewobsadźenym dźěłowym městnam wučerjow a časam chorosće w kolegijach wěnował. Wšě ličby z wotmołwy kultusoweho ministra Conrada Clemensa (CDU) su pod čisłom 8/3722 ćišćenki w dokumentaciskim systemje „edas“ krajneho sejma online přistupne. W srjedźišću zjawneje kedźbnosće steja ličby za předmjetaj němčina a serbšćina na zakładnych šulach, porno wyšim šulam a gymnazijam relacija wupadow tule wusahuje.