Na uniwersitomaj w Lipsku a Drježdźanach nowych studowacych witali

Lipsk/Drježdźany (CeK/VaŽ/SN). W filologiskej fakulće Lipšćanskeje uniwersity je so wčera něhdźe 25 ludźi zešło, zo bychu zymski semester 2025/26 w sorabistice zahajili. Na zarjadowanju, kotrež je direktor instituta za sorabistiku prof. dr. Edward Wornar nawjedował, wobdźěli so pjeć nowych studentow, kotřiž chcedźa sorabistiku za wučerstwo studować. Dalši student z Delnjeje Łužicy ma so pozdźišo přidružić. Nimo informacijow wo uniwersiće stejachu wčera zdobom serbske institucije w srjedźišću, kotrež swoje nadawki předstajichu. Katrin Suchec-Dźisławkowa prezentowaše Serbske šulske towarstwo a Rěčny centrum WITAJ. Syman Pawlik zastupowaše krajny zarjad za šulu a kubłanje (LaSuB) a dr. Lubina Malinkowa předstaji Serbski institut ze swojimi wobłukami dźěławosće.