Kónc wjelelětneho partnerstwa mjez šulomaj?

Šulska komisija wuchodočěskeje Královéhradeckeje regionalneje rady je zašły tydźeń rozsudźiła, zo maja so wšitke wjelelětne gymnazije w něhdyšim wokrjesu Jičínje zawrěć, dokelž je přemało šulerjow. To su starosće a powěsće derje znate tež ze Serbow. W Čěskej to nětko konkretnje rěka, zo w systemje štyrilětnych, šěsćlětnych a wosomlětnych šulow te poslednje dale njewostanu. Rozsud potrjechi tež Serbow, wšako ma gymnazij w městačku Hořice partnerstwo z Choćebuskim Delnjoserbskim gymnazijom. Z tym hrozy kónc tutoho partnerstwa. Na spočatku wuměny mjez šulomaj bě mjenujcy Choćebuske wuměnjenje: ze­znajomjeć młodšich šulerjow, zo bychu dźěći ručež móžno druhu słowjansku rěč zeznali. Lětsa je tomu tuž hižo dwaceći lět, zo jězdźa jedne lěto čěscy šulerjo do Serbow a druhe lěto serbscy do wuchodneje Čěskeje. Organizator wuměny je wot spočatka sem čěski wučer z Hořic dr. Jan Tomíček. Za Choćebuski gymnazij je to jenička wuměna z wukrajom.