Radworska komornica žada sej změnu financowanja pěstowarskich městnow

Radwor (SN/MiP). Komornica Radworskeje gmejny Melanie Mijanowa je hněwna. Hněwna, dokelž dyrbi sej gmejna wot staršich dźěći, kiž tři dźěćace dnjowe přebywanišća gmejny wopytuja, lěto wob lěto wyši popłatk kazać. Wosebje drastiske bě zwyšenje popłatka spočatk tutoho lěta. Cyłodnjowski přebytk prěnjeho dźěsća w žłobiku płaći tuchwilu 380 eurow, lěto do toho běše to hišće 317 eurow.