Dźeń wotewrjenych duri w serbskim kubłanskim srjedźišću LIPA

Smjerdźaca (SN/lmc). Z pisanym programom je serbske kubłanske srjedźišćo LIPA ze swojimaj studijomaj Liška a Lucija minjeny pjatk na dźeń wotewrjenych duri do Smjerdźaceje wabiło. Wot 13 do 19 hodź. móžachu wopytowarki a wopytowarjo najwšelakoriše poskitki wužiwać a so ze sobudźěłaćerjemi rozmołwjeć.

Něhdźe 200 hosći składnosć wuži a so na ponowjenym arealu rozhladowaše. „Nětko smy na dypku, hdźež je čas durje wotewrić a ludźom pokazać, što jich tule wočakuje“, organizatorka Michaela Rabowa wuswětli.