Podstupim (SN/MiR). Na Braniborskej techniskej uniwersiće poskića wot lětušeho zymskeho semestra studij wučerstwa za delnjoserbšćinu. Za Institut za sorabistiku Lipšćanskeje uniwersity so w zwisku z tymle poskitkom ničo njezměni, zdźěli nawoda wotrjada za nowinarske a zjawnostne dźěło w braniborskim minister­stwje za wědomosć, slědźenje a kulturu Stephan Breiding na naprašowanje SN. Najebać start wukubłanja wučerjow za zakładnu šulu na campusu BTU w Złym Komorowje ma kraj Braniborska dale wulki zajim za dobre wukubłanje wučerjow za dale wjeduce šule kaž tež za sorabistki a sorabistow w Lipsku. Zakład za financowanje je dojednanje wo kraje přesahowacym zhromadnym dźěle při wu- a dalekubłanju wučerjow za serbšćinu, sorabistow a sorabistkow mjez krajomaj Braniborska a Sakska z lěta 2016. „Kraj Braniborska přewostaja za financowanje dweju poł městnow z ćežišćom delnjoserbšćiny na Instituće za sorabistiku lětnje něhdźe 97 500 eurow. Za poł městna bě spěchowanje wjacore lěta wobmjezowane.