Wot serbskeje rjadownje dźensa hižo wjele njezwostawa

Radwor (SN/mb). W přichodnym 1. lětniku serbskeje zakładneje šule w Radworju njebudźe serbska rjadownja, ale jedna rjadownja z 21 šulerjemi. To je Serbskim Nowinam (SN) wčera rěčnik krajneho zarjada za šulu a kubłanje (LaSuB), Clemens Arndt, wobkrućił. Po našich informacijach bě drje wjac dźěći přizjewjenych. Informaciju, hač so přizjewjene dźěćo přiwozmje, pak starši hakle tele dny dóstanu. Sydom serbskich a serbowacych dźěći budu w serbšćinje, němčinje, matematice a wěcnej wučbje jako skupinu serbsce wuwučować. Mjez 21 šulskimi nowačkami nimaja po wuprajenju LaSuB tři dźěći žane znajomosće serbšćiny, wšitke druhe su doma a w pěstowarni „w rozdźělnej intensiće“ serbsce wuknyli. Rjadowniska wučerka njebudźe maćernorěčna Serbowka. LaSuB pak doda, zo změja dźěći rěčneju skupin 1 a 2 „hłownu wučbu“ pola maćernorěčneho wučerja abo wučerki.