Tójšto wučerjow ze serbskich šulow poda so na wuměnk abo změni šulu

Budyšin (SN/MiR). Mjeztym zo so aktualne šulske lěto nachila, přihotuje so Krajny zarjad za šulu a kubłanje (LaSuB) hižo na přichodne šulske lěto 2026/2027. Kaž rěčnik LaSuB Clemens Arndt na zhromadne naprašowanje mdr Serbskeho rozhłosa a Serbskich Nowin zdźěli, je wužadanje, potrjebu wučerjow zawěsćić, stupało. Přičina toho je demografiska změna. Aktualne naprawy za přistajenje traja hišće hač do 1. awgusta. „Njejsmy dotal wotchady wučerjow na serbskich šulach dospołnje z nowopřistajenjemi narunać zamóhli“, wón piše, „tuž wjedźemy tuchwilu a dale intensiwne rozmołwy z wučerjemi wo zaměrnym wotrjadowanju, zo móhli wučbu na wšitkich serbskich šulach najlěpje zawěsćić.“ Jasne je dotal wotrjadowanje wot Slepjanskeje zakładneje šule na zakładnu šulu w Zagorju, hdźež serbšćinu njepodawaja. Ze zakładneje šule Ralbicy ma jedna kolegowka na zakładnej šuli we Worklecach wučbu podawać.