Na serbskich zakładnych kaž tež wyšich šulach ličba šulerjow woteběra

Budyšin (SN/MiR). Za serbske zakładne šule w Ralbicach, Chrósćicach a Budyšinje a za Wojerowsku Handrija Zejlerjowu zakładnu šulu pytaja nowu nawodnicu abo noweho nawodu. Krajny zarjad za šulu a kubłanje (LaSuB) na to skedźbnja, zo njejsu jednanja z požadarjemi za nawodnistwo tutych šulow hišće wotzamknjene. Andrea Liehnowa a Andrea Rätzowa, nawodnicy Ralbičanskeje resp. Budyskeje zakładneje šule, woteńdźetej kónc šulskeho lěta na wuměnk. Angela Rynčowa nawjeduje mjeztym hižo někotre měsacy zakładnej šuli w Radworju kaž tež Chrósćicach. Do toho běchu nadawk w Chrósćicach Alexander Kozak, Sabina Hejdušcyna a Andrea Liehnowa wukonjeli. Wot lěta 2021, jako so Měrko Šmit na wuměnk poda, bě městno nawody w Chrósćicach wjacekróć wupisane. Dotal pak njeje LaSuB noweho nawodu našoł.