Budyšin (LuNo/SN). „Je wulka česć, zo směm jowle čěsce rěčeć,“ praji wčera na započatku swojeho wopyta na Budyskim Serbskim gymnaziju čěski wulkopósłanc w Němskej Jiří Čistecký, jako jemu šulerka na serbske wašnje chlěb ze selu poskići. Na wizitu bě jeho zapósłanc Sakskeho krajneho sejma Marko Šiman (CDU) přeprosył a jemu tež pokiw dał, zo měło so mjez murjemi tutoho kubłanišća słowjansce rěčeć.

„Je to rjana šula“, zwěsći wočiwidnje spokojny Čistecký w awli gymnazija. Najprjedy šulerka na dudach zahudźi, potom direktor gymnazija Renè Wjacławk wuwzaćneho hosća witaše, při čimž tradiciju partnerstwa Serbow z Čechami a z gymnazijom we Warnoćicach naspomni. Wučerka Jana Štillerová předstaji šulske projekty rěčneje wuměny mjez serbšćinu, čěšćinu a němčinu. „Jako sym před 22 lětami čěšćinu wuwučować započała, mějach w skupinach jenož wosom dźěći, dźensa mamy dwě rjadowni.“