Program kultusoweho ministerstwa ma wupady redukować

Radwor (cd/SN). Mjeztym, zo je na serbskich zakładnych šulach ličba wupadnjenych hodźin porno předchadźacemu šulskemu lětu lochce stupała, wona na wyšich šulach a gymnazijach spadowaše. Tole kryje so z powšitkownym trendom na šulach w zamołwitosći Budyskeje wotnožki Krajneho zarjada za šulu a kubłanje (LaSuB). Přičiny planowaneho wupada su po informacijach zarjada pobrachowacy wučerjo abo šulske rumnosće. Njeplanowe wupady nastanu mjez druhim chorosće wučerjow, dalekubłanja abo tež zapozdźenja busow dla. Nawodnica Radworskeje wyšeje šule „Dr. Marja Grólmusec“ Diana Wowčerjowa rjekny na naprašowanje SN: „Přičina za wupad wučby pola nas je w prěnim rjedźe chorobny staw wučerjow a falowacy personal.“ Zo bychu njedostatk wurunali, zepěraja so šule na nuzowe naprawy. Prěnja opcija je skrótšenje hodźinskeje tafle.