Stipendije Załožby za serbski lud tež za studowacych w Braniborskej

Budyšin/Zły Komorow (SN/MiR). Nowej studijnej směraj za wučerstwo na Techniskej uniwersiće Choćebuz/Zły Komorow (BTU) stej dwanaće zajimcow přiwabiłoj. Woni móža so wo financnu podpěru w formje stipendijow Załožby za serbski lud, wokrjesa Sprjewja-Nysa kaž tež města Choćebuz prócować. Dóstać pak njemóža ju hižo wot oktobra, hdyž so studiji ze zymskim semestrom 2026/27 zahaji. „Dokelž měri so stipendij załožby na nadpřerězne wukony studowacych w połnym studijnym předmjeće sorabistika abo wučerstwo za serbšćinu, móža so studenća hakle po zakónčenju 2. semestra wo njón požadać – studowacy BTU tuž hakle klětu“, wuswětla nawodnica teama za marketing, zjawnostne dźěło a zarjadowanja pola załožby, Hanka Budarjowa, na naprašowanje SN.