Na serbskich zakładnych šulach nowe šulske lěto swjatočnje zahajili

Ralbicy/Budyšin (SN/MiR). Z wjesołym a zdobom chětro wćipnym mjezwočom su sobotu lětuši šulscy nowačcy prěni raz jako šulerjo próh šule překročili. Na wšitkich přijimanjach knježeše dobra nalada. Hladajo na serbske šule je ličba wo něšto snadniša hač loni, tak so doba mjenje porodow zašłych lět tež na šulach pokaza. Mjez nowačkami njejsu na šulach jenož dźěći, ale tež někotři šulscy nawodźa. Na Chróšćanskej zakładnej šuli „Jurij Chěžka“ dźerži wotnětka Hanka Wowčerjowa wotežki jako nawodnica kubłanišća w rukomaj. Sobotu popołdnju je wona do wjacezaměroweje hale „Jednota“ wulku syłu hosći witała. 1. lětnik ze 14 šulerjemi a šulerkami nawjeduje Simona Šěnowa. Cyle po tradiciji šule su šulerjo 2. a 3. lětnika program přihotowali, za kotryž su pjatk dopołdnja zwučowali. Runja předchadźacym lětam su wučerku při přepo­daću cokorowych titow podpěrali.