W Serbskim šulskim a zetkawanskim centrumje ma nowa mensa nastać

Budyšin (SN/BŠe). Budyski wokrjes jako nošer Serbskeho šulskeho a zetkawanskeho centruma chce hač do kónca lěta 2028 nowu mensu natwarić. Zaměr je, zastaranje šulerjow a wobydlerjow internata z jědźu dołhodobnje zawěsćić a zdobom wjace městna w kubłanišću stworić, štož je hižo dlěje problem. Projekt wopřijima nowotwar mensy kaž tež dweju přidatneju rumnosćow za wuwučowanje na městnje tuchwilneje jědźernje.

Planowanje předewzaća je hižo postupowało, z wotmołwy na naprašowanje Serbskich Nowin wuchadźa. „Aktualnje wobdźěłatej so wukonowej fazy tři a štyri. Nimo toho bu próstwa wo spěchowanske srědki stajena“, nowinska rěčnica wokrjesa Sabine Rötschke informuje. Dalši wotběh wotwisuje wot rozsuda wo tutej próstwje. Inwesticija płaći něhdźe 3,5 milinow eurow. W nowej mensy maja jědźernja, kuchnja za wudawanje jědźe kaž tež za to trěbne pódlanske rumnosće nastać. Dalše funkcije njejsu w nowotwarje předwidźane, kotryž ma mjez ćěłozwučowarnju a internatom nastać, hdźež je nětčiša šulska zahroda.