Dr. Měrćin Wałda wo tym rozmysluje, što je z Chróšćan zběžka zwostało

Druhdy so w Serbach něšto hiba: tu jedna akcija, tam projekt, druhdy samo protest. A potom? Wšitko sej zaso wusnje. Tak tež po Chróšćanskim šulskim zběžku. Haj, wón je tehdy woprawdźe něšto zahibał, baza bě mobilizowana, ludźo su před šulu sylnje protestowali. Tola połoženje serbskeho šulstwa njeje so polěpšiło, skerje je so pohubjeńšiło.

Z dźensnišeho wida zdawa so to swojorazne: Njeby-li so spisowaćel Křesćan Krawc w Serbskich Nowinach (3. awgusta 2026) kritisce prašał, čehodla nochcedźa so „naši reprezentanća“ po 25 lětach na to dopominać, by so snano cyle na wurjadnu akciju w Chrósćicach pozabyło. „Što drje za tym tči?“, je so Krawc dale prašał. A hlej: Krótko po jeho skóržbje so někotre hłosy słowa jimachu, jenož „reprezentanća“ Serbow so njepřizjewichu.