Sokoł Ralbicy/Hórki II
– ST Nowe Město n. Spr. II 0:5 (0:1)
Zestawa domjacych: Měškank – Matka, Zynda, Serbin, Šnajder (61. Bernard), Kobalc (46. Bogusz), Šěn, Materna, Schultz, Kurjat, Šmit (68. Mět)
Wjedro za kopańcu njebě runjewon najlěpše a hra Sokoła Ralbicy/Hórki II tež nic. Jasnje su domjacy rezerwje z Noweho Města nad Sprjewju podleželi. Što pak běchu přičiny? Dokładnje da so to ćežko wujasnić. Wočiwidne bě, zo běchu hosćo spěšniši při bulu. Nimo toho jón w swojich rjadach dźeržachu. Tamniši trenar zasadźi nimo toho pjeć hrajerjow z prěnjeho mustwa. Tež to měło so snano při wuhódnoćenju poražki wobkedźbować.
Traktor Malešecy
– HZ Wulka Dubrawa 2:1 (1:1)
Zestawa domjacych: Seiler – Reck, Ludwig (46. Benad), Stewig, Zichel, Finke (92. Swakon), Wunsch, Koksch, Metasch (58. Hasse), Brumme, Bolz
Zestawa hosći: Zoch – Bens, Fechner, Steppat, Hoibik, (78. Taschke), Kirschke, Winzer, Seffek, Ritscher, Semmer (61. Lange), Richter
Cyle njenadźicy postara so młody Malešanski nadběhowar Florian Finke z hłójčkowanym bulom wo 1:0 (13.). Nadběhi přećiwnika běchu na to dale a sylniše, a škit domjacych wjacore razy „chětro płuwaše“. Wurunanje docpě Robin Steppat (21.).
W druhim połčasu přińdźe agilny nadběhowar Marco Benad za domjacych do hry. Wón staraše so wo njeměr a Finke zwyši na 2:1 (50.). Wulku šansu hosći Heiko Koksch na wrotowej liniju z ruku wotrazy, za čož pak dósta čerwjenu kartu. Słabje třělenu jědnatku wrotar Traktora Felix Seiler wotwobara. Hosćo z mužom wjace wězo hišće wšitko spytachu, ale bjez wuspěcha. Kurt Lorenc
FC Carl Zeiss Jena
– FSV Budissa Budyšin 0:0
Zestawa hosći: J. Jakubov – Kolan, Klippel, Pfanne (24. Patka), Kral, Rosendo, Hoßmang, Čermák, Reher (85. Walther), A. Jakubov, Salewski (75. Hansch)
Po prěnim dobyću sezony přećiwo mustwu Germanije Halberstadt nastupichu koparjo Budissy Budyšin pola FC Carl Zeiss Jeny. Hosćićel nochcyše zwisk k načolnikej FSV Zwickau zhubić a chcyše tuž dobyć. Wot wšeho spočatka so tež Budissa połnje do hry klakaše. Bohužel dyrbješe trenar Tomaš Henčl hižo zahe nutřkowneho škitarja Pfannu z hrajnišća wzać, dokelž hrožeše jemu žołto-čerwjena karta. 2 798 přihladowarjow domjacych podpěrowaše, kotřiž pak njemóžachu so tak prawje přesadźić. Najlěpšu móžnosć w prěnim połčasu za hosći měješe Čermák, ale šmórny wólny kop snadnje wyše wrotow.
Po hrě w Mužakowje měješe Hanspeter Benad składnosć z trenarjom Budissy, Tomašom Henčelom, porěčeć.
Knježe Henčlo, 1:2 w Mužakowje! To tola móžno njeje!?
T. Henčl: To je špatny són. Mějachmy dwě móžnosći, wrota docpěć. Njejsmy jej wužili, a přećiwnik bě sylny. Mužakow je šansy wužiwał. Na to smy z njemóžnymi srědkami hru dobyć spytali.
W prěnjej formaciji stejachu jenož hrajerjo z druheho rynka. Bě to zmylk?
T. Henčl: Ně, mamy w kadrje 22 koparjow. Wšitcy super trenuja a chcedźa hrać. W hrě pak treningowe wukony zwoprawdźić njemóža.
Što wot swojeho mustwa wočakujeće?
T. Henčl: Hru w Mužakowje dyrbi wone najspěšnišo zabyć.
Dyrbjachu Waši chowancy njedźelu hišće raz trenować?
T. Henčl: Haj, to su sej zasłužili. Tež wo wuhódnoćenje smy so postarali. Hanspeter Benad
Arnsdorfske ST – SJ Njebjelčicy 1:0 (0:0)
Zestawa hosći: Hahn – Šołta, Haška, Hanuza, Hoelzel, Lejnart, Dubaw, Hoier, C. Ričel (66. D. Ričel), Pawlik, Janca
Do Arnsdorfa wjedźeše puć Njebjelčanskich koparjow poslednju sobotu awgusta. Kak rady tam aktiwni kumštneho trawnika dla hraja, je wšitkim znate. Při přewšo horcym wjedrje so Njebjelčenjo cyle derje, a to zaso jeno z minimalnej wobsadku prezentowachu. Nico Hahn w wrotach hosći dwójce za sobu w prěnim połčasu jara derje zakroči a zastatkej zadźěwa. Robert Lejnart a Chrystof Dubaw, kotrajž trjechištaj łatu, pak swojej móžnosći njewužištaj. Tak měnještej so stronje při stawje 0:0.
W druhim połčasu Lejnart, Dubaw a Matijas Hoier šansy k wrotam njewužiwachu. Tež někotre spěšne nadběhi domjacych k swójskemu wužitkej njedosahachu. Wšitko pokazowaše hižo na njerozsudny wukónc. Krótko do kónca pak falowaše Njebjelčanskim škitarjam trěbna koncentracija. Po wótrje třělenym róžku smokny Arnsdorfski nadběhowar z wótreho kuta kulowatu kožu k dobyćerskim wrotam do hornjeho třiróžka.
ST Wóslink/Skaskow
– SJ Njebjelčicy 2:3 (1:3)
Zestawa domjacych: Wróbl – Henke, Buša (70. Sćapan), Šěrak (76. Bauer), Zähr, von Karwin, Šram, Nuk, Mark (80. Wjeńka), Winar, Schulze
SV Frankenthal
– ST Marijina hwězda 4:3 (3:2)
Zestawa hosći: O. Schmidt – Wróbl (50. Czapik), Škoda, Łušćanski, Hawš, T. Jurš, Sbjeznie, Langer (80. Lipič), P. Schmidt, Pakoßnick (73. Winkler), D. Jurš