Mikowčanka Beatris Sachse wobdźěla so wot lěta 2008 na wubědźowanju wo najrjeńše­ serbske jutrowne jejko. Tež za lětuše 64. wurisanje chce swoju kolekciju zapodać. Hač do jutřišeho pjatka je za to hišće chwile.

W fakultatiwnej wučbje serbšćina B na Hućinjanskej šuli je so Beatris Sachse jako dźewjećlětna z debjenjom jutrownych jejkow zeznajomiła. Tak su potom doma w Hućinje w swójbje jejka debili. Wukubłana šwalča za muži tule swójbnu tradiciju hač do dźensnišeho swěrnje dale wjedźe. Do jeje šwalčernje w Mikowje ludźo rady přichadźeja. W jutrownym času móža tam tež serbske jutrowne jejka z jeju wušikneju rukow kupować.