Rumnostne wuměnjenja we Worklečanskim šulskim twarjenju načinjeja gmejnje dźeń a wjetše starosće. Tole bě na wčerawšim posedźenju gmejnskeje rady wusłyšeć.

Worklecy (SN/MWj). Ličba šulerjow na Worklečanskej zakładnej a wyšej šuli „Michał Hórnik“ dale přiběra. Štož klinči najprjedy raz zwjeselace, načinja gmejnje přiběrajcy brjušebolenje. Rumnostne wu­měnjenja su dawno wučerpane. A za nowe šulske lěto předleži za wyšu šulu 31 přizjewjenjow do 5. lětnika. Hač wu­tworja jednu rjadownju abo dwě, dotal znate njeje.­ Jasne pak je, zo w šulskim twarjenju hižo rumnosće za hort wužiwać njemóža. Tohodla je wjesnjanosta Franc Brusk (CDU) swojemu Njebjelčanskemu koleze Tomašej Čornakej list pisał. W nim rysuje prekerne rumnostne wuměnjenja na­stupajo hort. Tuchwilu staraja so w nim wo 85 dźěći. Za přichodne šulske lěto předleži 22 nowych přizjewjenjow. Z tym je móžna kapacita Worklečanskeje gmejny docpěta. Tohodla Brusk w lisće prosy, zo by Njebjelčanska gmejna wot noweho šulskeho lěta za 22 hortowych šulerjow 3. a 4. lětnika sama rumnosće přewo­stajiła a so w nich wo holcy a hólcow starała.