Hórnikečanski jězor je tuchwilu hišće wulke twarnišćo, hdźež z ćežkej techniku přibrjóh saněruja. Łazowska gmejna pak hižo nětko rozmysluje, kak ma tam po lěće 2021 dale hić.

Łaz (AK/SN). Hórnikečanski jězor chce Łazowska gmejna po lěće 2021 zaso zaměrnje wužiwać. K tomu su so gmejnscy radźićeljo na swojim zašłym posedźenju wuznali. Na zasadny rozsud w lěće 2015, na płoninje bywšeho stanowanišća 1, hdźež su něhdy dnjowi hosćo přenocowali, towarstwowy centrum natwarić, komuna nětko nawjazuje. Łazowski wjes­- njanosta Thomas Leberecht (CDU) dósta nadawk, katalog naprawow zdźěłać. Wone měli na to wusměrjene być, wobtwarjenski teren „Towarstwowy centrum Hórnikečanski jězor“ trěbnym medijam přizamknyć.